VOV4.Jarai - Tlam lơ 3/11, Ngă lơphet čơkă Khua dêh čar ơi Phạm Minh Chính hrŏm hăng Khua mua pơ ala Việt Nam sit nik nao čuă dêh čar Prang hơmâo pơphun ƀơi Sang bruă Invalides, plơi prong jưh jom Paris. Tơdơi kơ mông tŭ jum, Khua dêh čar ơi Phạm Minh Chính hơmâo bưp Khua git gai pơ ala mơnuih ƀon sang gơnong dlông dêh čar Prang Gérard Larcher. Khua git gai pơ ala mơnuih ƀon sang gơnong dlông dêh čar Prang pơpŭ bơni, lăng yôm biă kơ bruă Việt Nam dưi pơplih tơlơi bơwih ƀong, pơđĭ kyar tañ, samơ̆ ăt djă pioh na nao gru grua hiam mơng lŏn ia. Khua dêh čar ơi Phạm Minh Chính lăng yôm biă kơ tơlơi gum pơgôp prong, yôm mơng dua anom bruă pơ ala mơnuih ƀon sang amăng bruă hơkrŭ kơjăp tơlơi ngă hrŏm amăng lu mơta kơplah wah Việt Nam hăng Prang.

Khua dêh čar ơi Phạm Minh Chính sit nik nao čuă dêh čar Prang

Dua bơnah ăt lăi nao hơdôm tơlơi hơmâo amăng kual hăng jar kmar mơ̆ dua bơnah lăp đing nao, amăng anun hơmâo bruă ƀơi ia rơsĭ Ngŏ, laih dong lăi hơdôm boh dêh čar kiăng gum djru djă bong tơlơi rơngai, hơđong hăng pơdrong asah. Tơdơi kơ anun, Khua dêh čar ơi Phạm Minh Chính hăng Khua dêh čar Prang Jean Castex ƀuh ƀơi anăp bruă kĭ pơkôl kơplah wah hơdôm anom bruă čar hăng anom bơwih ƀong dua bơnah.

Siu H’Mai: Pơblang