VOV4.Jarai-Ăt amăng tal jơnum hrom abih bang hơmâo jơnum khua mua pơprong kual ASEAN hăng hơdôm dêh čar ngă gơ̆p amăng mông jơnum ASEAN tal 38 hăng tal 39 tlam lơ 26/10, Khua dêh čar ơi Phạm Minh Chính nao jơnum hrom khua mua ASEAN-Hàn Quốc. Pơhiăp ƀơi mông jơnum, Khua dêh čar ơi Phạm Minh Chính lăi, rơbêh 30 thun rơgao, tơlơi ngă giăng mah ASEAN-Hàn Quốc pơđĭ kyar kơtang biă mă, dưi ba glăi lu boh tơhnal yôm, tŭ yua sit nik, djru hrom hiam amăng bruă pơgang rơnuk rơnua, hơđong laih anun pơđĭ kyar pơdrong asah amăng kual.

Việt Nam bơni biă mă hăng dong yua Hàn Quốc pok pơhai “Jơlan hơdră anăp nao gah dơnung phrâo kơtưn lu hloh” kiăng pơtrut bruă ngă hrom amăng kual yua tơhnal pơkă anăp nao lĕ Mơnuih ƀôn sang, Tơlơi rơnuk rơnua hăng Pơdrong asah; djơ̆ hăng 3 bruă phun ngă hrom amăng kual ASEAN. Khua dêh čar ơi Phạm Minh Chính dong yua hăng rơkâo tal jơnum anai pơsit hĭ Hră pôr hrom kơtưn ngă hrom ASEAN hăng Hàn Quốc.

Nay Jek: Pơblang