VOV4.Jarai-Mơguah lơ 23/5, pơ anih plĕ hră mrô 18, phường Cái Khế, kuân Ninh Kiều, ƀôn prong Cần Thơ, ơi Phạm Minh Chính Khua dêh čar hrom hăng lu mơnuih ƀôn sang, khua mua ƀôn prong Cần Thơ nao jơnum pok bruă plĕ hră ruah khua pơ ala mơnuih ƀôn sang dêh čar tal XV hăng pơ ala mơnuih ƀôn sang djop gưl, rơwang bruă thun 2021-2026.

Khua dêh čar ơi Phạm Minh Chính

Tui hăng Khua dêh čar, mơnuih apăn akŏ anom bruă ngă tui tơlơi phiăn dêh čar, ruah mơnuih pơ ala kơ sang bruă hơmâo tơlơi dưi prong hloh mơ̆ng Kơnuk kơna, dưi pơdah rai amăng bruă ƀing ta pơphun bruă ruah khua bơkơnar, mơnuih ƀôn sang ngă khua pô, pơhaih tơpă, klă hiam, pioh kơ djop mơnuih plĕ hră ngă tui tơlơi dưi hăng bruă ngă mơ̆ng pô ruah mơnuih lăp hloh ngă pô pơ ala amăng sang bruă hơmâo tơlơi dưi prong hloh amăng kơnuk kơna hăng anom bruă hơmâo tơlơi dưi prong hloh dêh čar lĕ anom bruă pơ ala mơnuih ƀôn sang dêh čar tal XV.

Hlâo kơ nao ruah khua, ƀing khua mua pơ ala hăng mơnuih plĕ hră ăt ngă tui djơ̆ tơlơi phiăn pơtrun kơ hơdră pơhlôm, pơgang klin Covid 19 kah hăng pơhaih tơpă bruă ia jrao, rao rơngan hăng ia jrao pơdjai kman, truă akhăn gôm ƀô̆, dŏ ataih djơ̆ hnong pơkă.

Nay Jek: Pơblang