VOV4.Jarai - Pơhiăp ƀơi mông Jơnum pơčrông sai tơlơi pơđĭ kyar pơgi kơdih ƀơi kual Châu Á yua Nikkei pơphun amăng lơ 20/5/2021, lăng nao rai amăng tivi, Khua dêh čar ơi Phạm Minh Chính lăi, sa kual Châu Á hrưn đĭ yua tơlơi rơnuk rơnua, đĭ kyar hơđong hăng pơdrong asah lĕ tơlơi kiăng hrŏm mơng abih bang dêh čar amăng kual, tơlơi dưm kơnar kơplah wah hơdôm dêh čar, tơlơi gir run mơng Kơnuk kơna, tơlơi gum hrŏm mơng abih bang jing boh pơkhuă akŏ pơdong sa kual Châu Á pơdrong asah klă hiam pơ anăp anai. Hơmâo pơphun ngă mơng thun 1995, Jơnum jar kmar kơ Tơlơi đĭ kyar pơgi kơdih kual Châu Á lĕ amăng hơdôm mông jơnum rim thun prong hloh, hmư̆ hing hloh ƀơi kual châu Á yua Grup bơwih ƀong Nikkei (Japan) git gai. Mông jơnum ngă pơhưč arăng lăp đing nao, hơmâo lu khua mua, ƀing tuai yơyôm, anom bơwih ƀong mơng kual Châu Á ăt kah hăng khua pơ ala kơ grup bơwih prong prong ƀơi rŏng lŏn tơnah pơhmư̆ tom. Ƀơi mông jơnum, ƀing khua hơmâo lăi nao tơpă djŏp tơlơi hơmâo amăng kual, tơlơi gơgrong yôm hăng tơlơi gêh gal mơng Châu Á ƀơi rŏng lŏn tơnah hăng hơdră pơđĭ tui tơlơi kơdrưh kơang mơng kual hăng akŏ bruă: “Akŏ pơdong rơnuk tơdơi Covid-19: Tơlơi gơgrong bruă mơng châu Á hăng tơlơi rŭ pơdong dêh čar ƀơi rŏng lŏn tơnah”. Pơhiăp ƀơi mông jơnum, ơi Phạm Minh Chính pơsit, Việt Nam gum ngă bruă amra hrŏm hăng hơdôm boh dêh čar gum pơgôp, pơbuă tui tơlơi rơngai hăng tơlơi gum pơgôp, yua tơlơi klă hiam hrŏm hăng tơlơi pơđĭ kyar mơng rim boh dêh čar amăng kual, yua tơlơi trơi pơđao yâo mơ-ak mơng abih bang mơnuih ƀơi rŏng lŏn tơnah.

Siu H’Mai: Pơblang