VOV4.Jarai - Jơnum Kơnuk kơna tui tơđar blan 10/2021 pơphun amăng hrơi dêh čar tơdơi kơ mông pơgang klin Covid-19 kơtang hloh amăng hrơi klin hơđuh tal 4, truh ră anai klin dưi mơn pơgang hĭ. Tơlơi bơwih ƀong - mơnuih mơnam blan 10 hơmâo lu tơlơi pơplih, bơwih ƀong đĭ glăi laih yua pơplih hơdră ngă bruă mơng pơƀut jing kah pơpha gưl phara truh pơ kual plơi pla, pơgang klin tui jơlan hơdip hrŏm rơnuk rơnua, hơdeč hmar, pơplih mă kiăng djơ̆, wai pơgang klă klin Covid-19. Pơhiăp tum pơƀuh ƀơi mông jơnum anai, Khua dêh čar ơi Phạm Minh Chính kiăng ngă bruă hơdeč hmar, dưi pơplih mă kiăo tui klin kheng mơn, pơgang klă klin Covid-19 tui tơlơi pơmin wai lăng tơlơi truh, hăng pơtrut rŭ glăi tơlơi bơwih ƀong, pơhlôm tơlơi hơdip mơnuih ƀon sang. Ƀơi anăo tơlơi lông prong mơng klin, Khua dêh čar lăi kiăng tlâ̆o vaccine tañ ƀiă, pơhlôm rơnuk rơnua, tŭ yua, anăm dŏ kun ôh, biă ñu pơƀut ngă brơi hơdôm boh tơring čar, kual hơmâo klin kơtang kah hăng hơdôm boh tơring čar Yŭ Dơnung dêh čar.

Siu H’Mai: Pơblang