VOV4.Jarai - Tlam lơ 6/12/2021, Khua dêh čar ơi Phạm Minh Chính hăng Khua dêh čar Hà Lan Mark Rutte hơmâo mông pơhiăp telephôn pơčrông sai hơdôm bruă pơtrut dong tơlơi rô nao rai ngă hrŏm kơplah wah Việt Nam - Hà Lan pơ anăp anao. Khua dêh čar ơi Phạm Minh Chính lăng yôm hăng pơpŭ bơni tơlơi gum djru mơng Kơnuk kơna Hà Lan hăng hơdôm anom bơwih ƀong sĭ mơdrô Hà Lan hơmâo djru brơi gơnam măi mok gah ia jrao nua ñu 40 klai prăk djru brơi Việt Nam găn rơgao tơnap tap amăng pơgang klin Covid-19 hơđuh đĭ tal 4 anai; pơsit tong Việt Nam lêng kơ lăng yôm bruă pơđĭ kyar tơlơi rô nao rai giang mah hăng ngă hrŏm djop mơta hăng dêh čar Hà Lan. Khua dêh čar čang rơmang Hà Lan djru brơi Việt Nam pơlir hơbit hăng hơdôm tơdrun tum păn hăng kual bơwih ƀong sĭ mơdrô kual Mi kô̆, djru đĭ tui gơnam ba sĭ mơdrô pơ tač rơngiao mơng Việt Nam nao hơdôm kual ania; pơtrut bruă sĭ mơdrô hăng tuh pơ alin mơng dua bơnah jai pơđĭ kyar, prong tui hăng hơđong kjăp dong. Dua čô khua tŭ ư tŏ tui pơlăi nao rai na nao kah hăng bruă ngă hrŏm amăng ngă hrŏm tơdrun tum păn, pơtô hrăm, tuai čuă ngui …

Siu Đoan: Pơblang