VOV4.Jarai - Tlam lơ 12/7/2021, Khua dêh čar ơi Phạm Minh Chính pơhiăp telephôn hăng Khua dêh čar Israel Naftali Bennett. Khua dêh čar Naftali Bennett bơni biă kơ tơlơi dưi ngă mơng Việt Nam amăng hrơi blan rơgao amăng bruă pơgang klin Covid-19, ăt kah hăng amăng bruă pơđĭ kyar bơwih ƀong huă, mơnuih mơnam, pơtom hiăp hăng dêh čar tač rơngiao. Ñu pơsit, Israel kiăng pơtrut hloh dong tơlơi ngă hrŏm amăng lu bruă hăng Việt Nam. Khua dêh čar ơi Phạm Minh Chính hơ-ơč hmưi kơ ơi Naftali Bennett hơmâo ruah ngă Khua dêh čar Israel. Amăng hrơi mông djuai phrâo klin Covid-19 jai hrơi kơtang tui, Khua dêh čar Phạm Minh Chính kiăng dua bơnah ngă hrŏm kơjăp hloh dong amăng bruă pơgang klin. Dua čô khua tŭ ư amra ngă hrŏm kơjăp hloh amăng lu mơta bruă, jai hrơi sit nik, tŭ yua; pơtrut tañ bruă bơkơtuai, kĭ pơkôl hră bơwih ƀong sĭ mơdrô rơngai hăng Hră pơkôl ngă hrŏm mơnuih mă bruă kơplah wah dua bơnah; kiăng dưi ngă lu tơlơi prong hloh, gir pơđĭ bruă tuh pơ plai, sĭ mơdrô dua bơnah, anăp nao rŭ pơdong glăi tơlơi bơwih ƀong tơdơi hrơi abih klin.

Siu H’Mai: Pơblang