VOV4.Jarai- Tlam lơ 19/7, Khua dêh čar ta ơi Phạm Minh Chính pơhiăp telephôn hăng Khua grup AstraZenenca Pascal Soriot. Amăng mông pơhiăp telephôn, Khua dêh čar ta pơsit tong vaccine AstraZeneca lĕ sa amăng hơdôm djuai vaccine hơmâo mă yua lu hloh amăng rŏng lŏn tơnah, dưm dưm 65% mrô vaccine mơ̆ Việt Nam tŭ mă truh ră anai, pơgôp yôm phăn amăng bruă pơgang klin amăng rŏng lŏn tơnah hăng ƀơi Việt Nam.

Amăng thun blan klin Covid-19 glăk ngă tơnap tap, Khua dêh čar rơkâo Khua grup AstraZeneca đing nao git gai pơtrut tañ bruă jao vaccine brơi Việt Nam, blung hlâo lĕ jao abih mrô vaccine pơkôl 8 klăk liều amăng blan 8 anai, laih dong kơtưn hăng gir run kĭ pơkôl djru brơi dong vaccine brơi Việt Nam amăng blan 9 thun 2021 hăng truh rơnuč thun 2021. Khua dêh čar ta rơkâo hăng čang rơmang grup AstraZeneca sem lăng, pơčrông lô hăng hơdôm dêh čar pơkŏn kiăng kơ dưi čan mă, jao glăi mrô vaccine ră anai aka ƀu kiăng yua; laih dong kĭ pơkôl blơi vaccine brơi ƀing čơđai hăng mơnuih pơ gŭ 18 thun, ƀing mơnuih amuñ ƀă klin hăng hơmâo tơlơi ruă amăng drơi jăn.

Siu Đoan: Pơblang