VOV4.Jarai - Ƀơi Sang bruă Kơnuk kơna, Khua dêh čar ơi Phạm Minh Chính hơmâo pơhiăp telephôn tom Khua dêh čar pơlir hơbit Anglê hăng Bắc Ailen Boris Johnson. Ƀơi mông pơhiăp tom, dua čô khua dêh čar hok mơ-ak kơ hơdôm tơlơi pơđĭ kyar kơtang mơng tơlơi rô nao rai ngă gŏp kơplah wah Việt Nam hăng Anglê amăng hrơi blan giăm anai, tŭ ư ngă hrŏm kơjăp đah mơng dưi ngă hrŏm gah kơđi čar - pơtom hiăp, bơwih ƀong huă - sĭ mơdrô - tuh pơ plai, ngă hrŏm pơđĭ kyar, pơtô pơjuăt, boh thâo ia rơgơi măi mok, ling tơhan - rơnuk rơnua lŏn ia, pơbưp nao rai mơnuih ƀon sang.

Kơ bruă ngă hrŏm lu bơnah, dua čô Khua dêh čar lăng djơ̆ pran biă kơ tơlơi ngă hrŏm klă hiam mơng dua bơnah ƀơi Khul pơgang rơnuk rơnua sang gum hơbit djŏp dêh čar amăng rơwang thun Việt Nam ngă Ding kơna (2020-2021) hăng amăng mông Jơnum ngă hrŏm kual ASIA - Mi Kô̆ (ASEM).

Siu H’Mai: Pơblang