VOV4.Jarai - Khua dêh čar ơi Phạm Minh Chính phrâo hơmâo mông jơnum lăng nao rai amăng tivi hăng yă Aurélia Nguyen, Khua git gai Jơlan hơdră COVAX. Ƀơi mông jơnum, Khua dêh čar hok mơak hăng bơni biă mă tơlơi gơgrong bruă mơng COVAX amăng bruă hyu ĕp anih djru brơi, kah pơpha dưm kơnar vaccine pơgang Covid-19, gum pơgôp amăng bruă pơgang klin. Pơhiăp hăng yă Aurélia Nguyen, Khua dêh čar ta pơsit jơlan hơdră ngă bruă tơpă sit mơng Việt Nam lĕ tơlơi suaih pral hăng rơnuk rơnua kơ ană plơi pla yơh phun ñu; Việt Nam glăk gir tlâ̆o vaccine brơi abih bang mơnuih, tañ hloh tơdah dưi. Khua dêh čar kiăng COVAX djru brơi vaccine kơ Việt Nam jai tañ jai hiam hloh, biă ñu lĕ amăng blan 9, 10, 11; ngă giong hră kĭ pơkôl brơi vaccine kơ Việt Nam amăng thun 2021. Khua dêh čar ăt rơkâo COVAX kah pơpha, brơi vaccine Moderna kiăng Việt Nam tlâ̆o arăt 2 kơ mơnuih ƀon sang.

Siu H’Mai: Pơblang