VOV4.Jarai - Yang hrơi dong tui mông Việt Nam (22/11), Khua dêh čar ơi Phạm Minh Chính hrŏm hăng khua mua pơprong mơng dêh čar ta nao cuă Japan tui tơlơi jak iâu mơng Khua dêh čar Japan ơi Kishida Fumio. Tal nao čuă sit nik Japan blung a mơng Khua dêh čar ơi Phạm Minh Chính hơmâo pơphun amăng mông tơlơi rô nao rai dua bơnah glăk klă hiam hloh dong mơng hrơi akŏ pơdong tơlơi pơtom hiăp, hơmâo đăo gơnang prong biă. Tal nao čuă jing pơƀuh jơlan hơdră pơtom hiăp hăng čar rơngiao gơgrong mă pô, yua tơlơi rơngai, ngă hrŏm mơ-ak hăng đĭ kyar hơmâo pơsit laih amăng mông Jơnum khua mua Ping gah dêh čar tal 13.

Việt Nam lêng ngă gơyut, dêh čar ngă gŏp jê̆ giăm, đăo gơnang mơng Japan hăng dong yua Japan pơtrut tơlơi gơgrong bruă yôm amăng kual hăng ƀơi rŏng lŏn tơnah, hrŏm hăng Japan gum pơgôp djă bong tơlơi rơngai, hơđong kơjăp, ngă hrŏm hăng pơđĭ kyar hrŏm amăng kual. Việt Nam amra hrŏm hăng Japan pok rai sa rơwang thun pơđĭ kyar phrâo, sit nik, tŭ yua hlôh amăng djŏp bruă, biă ñu gah bơwih ƀong, rơnuk rơnua - ling tơhan, kual plơi pla, pơbưp nao rai mơnuih ƀon sang.

Siu H’Mai: Pơblang