VOV4.Jarai-Mơguah lơ 29/7, ƀơi anom bruă kơnuk kơna, ơi Phạm Minh Chính Khua dêh čar hơmâo tŭ jum Khua anih jưh pơ ala dêh čar Cuba, Orlando Nicolas Hernandez Guillen nao mă tơngan. Ƀơi mông bưp, hăng tơlơi mơak giăng mah, puăi tlao rơhmač, Khua dêh čar ơi Phạm Minh Chính bơni hơ-ơč kơ Khua anih jưh pơ ala, Orlando Nicolas Hernandez Guillen ba nao hră mơ̆ng dêh čar mơ-it kơ Khua mir sir lơ 13/7 hăng lăi pơtong Kơnuk kơna Việt Nam amra git gai djop ding jum, anom bruă djru ngă gêh gal pioh kơ Khua anih jưh ngă giong bruă jao ƀơi Việt Nam.

Khua dêh čar ơi Phạm Minh Chính lăi pơtong, Việt Nam lăng yôm bruă ngă giăng mah tong ten, pơlir hơbit đăo kơnang nao rai hăng Cuba, dưi hơmâo Khua mir sir Hồ Chí Minh laih anun Khua apăn akŏ ơi Fidel Castro pô pơjing atur laih anun lu gưl khua mua, mơnuih ƀôn sang dua bơnah ƀu pơdơi ôh pơbŭ đĭ na nao amăng 60 thun rơgao.

Boh nik ñu hơdôm thun giăm anai, Ding jum, anom bruă dua bơnah djru hrom pơsir tơlơi tơnap tap yua klin Covid 19 hăng ƀu pơdơi ôh pơtrut đĭ ngă hrom pơđĭ kyar amăng djop bruă mă.

Nay Jek: Pơblang