VOV4.Jarai - Tlam lơ 3/8, Khua dêh čar ơi Phạm Minh Chính tŭ jum Khua anih jưh pơ ala dêh čar Nga ƀơi Việt Nam, Bezdetko rai bưp, mă tơngan. Khua dêh čar pơsit Việt Nam lêng hơdor bơni hơdôm tơlơi djru yôm pơphăn mơ̆ Liên Xô hlâo adih hăng dêh čar Nga ră anai pioh kơ Việt Nam amăng rơnuk hơkrŭ rơngai lŏn ia hăng pơđĭ kyar lŏn ia.

Ơi Phạm Minh Chính tŭ jum ơi Bezdetko, khua anih jưh dêh čar Nga

Khua dêh čar hok mơ-ak lơ̆m ƀuh tơlơi rô nao rai kơplah wah dua bơnah jai hrơi hiam tui, bơbưp khua mua hơmâo pơphun ngă na nao hluai tui bruă pơtom hiăp amăng telephôn hăng lăng nao rai amăng tivi. Khua anih jưh pơ ala dêh čar Nga Bezdetko pơsit Việt Nam lĕ dêh čar ngă gŏp yôm hloh mơng dêh čar Nga ƀơi kual ASIA- Thái Bình Dương; biă ñu lĕ tŭ ư hăng tơlơi pơtŏng glăi hăng hơdôm hơdră pơtrut tui tơlơi rô nao rai dua bơnah mơ̆ Khua dêh čar Phạm Minh Chính lăi hăng pơsit amra gum pơgôp hơkrŭ hăng hruă kơjăp hloh tơlơi rô nao rai kơplah wah Việt Nam hăng Nga.

Siu H’Mai: Pơblang