VOV4.Jarai-Tlam lơ 30/9, ƀơi anom bruă kơnuk kơna, Khua dêh čar ơi Phạm Minh Chính hơmâo tŭ jum ơi Gareth Ward, Khua anih jưh pơ ala dêh čar Angle hăng Ireland ƀơi Việt Nam. Khua dêh čar lăi dêh čar Angle lĕ sa boh dêh čar sĭ mơdrô ba akŏ mơ̆ng Việt Nam ƀơi kual Mi kô̆; dua bơnah kiăng ngă hrom tong ten hloh pioh mă yua tơlơi gêh găl mơ̆ng Hră pơkôl sĭ mơdrô rơngai dua bơnah, rơkâo dêh čar Angle pok bah amăng prong hloh anih anom si mơdrô tuh pơ alin ƀơi Việt Nam, laih dơ̆ng pơtrut pơsur anom bruă sĭ mơdrô dêh čar Angle tuh pơ alin ƀơi Việt Nam, biă mă ñu hơdôm bruă hơmâo tơlơi gêh găl bơwih bơwăng pơblih nao rai prăk kăk-sang bruă prăk, ia jâo, ayuh čuh, apui lơtrik pơkra ming glăi, tơlơi bơwih ƀong  huă tui hơdră mrô, bruă tuh tia pơkra ming, pơčeh phrâo ia rơgơi  măi mok.

Ƀrô djơ̆ tal anai, Khua dêh čar ta ơi Phạm Minh Chính mơ-it hiăp bơni kơ kơnuk kơna dêh čar hăng mơnuih ƀôn sang Angle hơmâo djru 415 rơbâo liêu vaccine AstraZeneca kơ Việt Nam. Khua dêh čar čang rơmang dua bơnah dêh čar ăt pơtrut ngă hrom gah bruă ia jrao, pơkra ming ia jrao; rơkâo dêh čar Angle djru ia jrao vaccine, gơnam yua tlâ̆o ia jrao, djru pơtô brơi bruă pơkra vaccine, hơdră pơjrao mơnuih duăm ruă djơ̆ kman Covid 19.

Nay Jek: Pơblang