VOV4.Jarai-Tlam lơ 28/5, ƀơi anom bruă kơnuk kơna, Khua dêh čar ơi Phạm Minh Chính hơmâo tŭ jum ơi Alok Sharma, Khua ding jum anom bruă kơnuk kơna dêh čar Angle, Khua git gai jơnum tal 26 hơdôm bơnah ngă hrom hră pơkôl mơ̆ng sang gum hơbit djop dêh čar kơ bơblih ayuh hyiăng lŏn tơnah COP26, hlăk rai čuă hăng mă bruă ƀơi Việt Nam.

Ƀơi mông bưp, dua bơnah hơmâo pơčrông sai lu bruă rơđah rơđong, tŭ yua kiăng ba tơlơi ngă giăng mah yôm kơplah wah Việt Nam-Angle pơđĭ kyar djơ̆ lăp amăng hrơi blan mơ̆ rŏng lŏn tơnah bưp lu tơlơi lông lăng, boh nik ñu anŏ bơblih ayuh hyiăng hăng klin Covid 19.

Khua dêh čar rơkâo kơnuk kơna Angle ăt djru Việt Nam prăk kăk, boh thâo ia rơgơi, tơlơi thâo thăi amăng bruă bơblih hơdră bơwih ƀong huă pơhrŏ ƀiă ngă tơbiă ayuh carbon sat laih anun pơđĭ hnong bong glăi hăng anŏ bơblih ayuh hyiăng boh nik amăng kual jai hrơi bơbeč kơtang ia rơsĭ đĭ kơtang.

Khua jơnum COP26 ơi Alok Sharma lăi pơtong, dêh čar Angle ăt djru Việt Nam bong glăi anŏ bơblih ayuh hyiăng, hơmâo tom bruă pơtrut pơđĭ kyar mă yua apui lơtrik pơkra glăi hăng pơgang mơtah mơda.

Nay Jek: Pơblang