VOV4.Jarai- Mơguah lơ 9/11, ƀơi Ƀirô Kơnuk kơna, Khua dêh čar ơi Phạm Minh Chính tŭ jum Khua ding jum pơtom hiăp dêh čar Australia yă Marise Payne ƀrô tal rai čuă pơ dêh čar Việt Nam. Khua dêh čar ơi Phạm Minh Chính hok mơ-ak hăng hơdôm tơlơi dưi ngă mơng Kơnuk kơna hăng mơnuih ƀon sang Australia amăng bruă pơgang klin Covid-19 hăng hơkrŭ, pơđĭ kyar bơwih ƀong huă amăng hrơi blan laih rơgao; pơpŭ bơni kơ Kơnuk kơna Australia ƀuăn djru brơi 5 klăk 200 rơbâo liều vaccine kơ dêh čar Việt Nam hăng čang rơmang Australia tŏ tui djru brơi Việt Nam amăng bruă pơgang klin hăng hơkrŭ glăi, pơđĭ kyar bơwih ƀong huă mơnuih mơnam … Khua dêh čar lăng yôm hơdôm boh tơhnal mơng Jơnum khua ding jum pơtom hiăp tal 3 kơplah wah dua boh dêh čar, hăng lăng anai lĕ kiăng pơdah tơlơi gir run mơng dua bơnah kiăng pơtruh rô nao rai ngă hrŏm dua bơnah. Khua dêh čar ơi Phạm Minh Chính rơkâo Australia tŏ tui djru pơđĭ kyar sit nik kơ dêh čar Việt Nam hăng sem lăng bruă pok glăi blơi sa, dua gơnam đang hmua-akan hơdang mơng dêh čar Việt Nam kah hăng sem lăng bruă pok pơhai Jơlan hơdră ngă hră pơ-ar mut nao mă bruă kơ mơnuih ƀon sang Việt Nam, pơsur anom bơwih ƀong sĭ mơdrô dua bơnah tuh pơ alin.

Siu Đoan: Pơblang