VOV4.Jarai - Tlam lơ 14/12, ƀơi Hà Nội, Khua dêh čar ơi Phạm Minh Chính nao jơnum hrŏm Jơlan hơdră tơlơi dưi mơng pơphun bruă pơplih pơčeh phrâo amăng deh čar hăng rơwang hrơi tơjuh pơplih pơčeh phrâo hăng pơphun bruă mă ƀơi ƀôn prong Hồ Chí Minh (TECHFEST hăng WHISE 2021) yua kơ Ding jum boh thâo mă mok gum hrŏm hăng Ding jum pơtom hiăp, Jơnum min mơnuih ƀon sang ƀôn prong Hồ Chí Minh, anom bruă sĭ mơdrô hăng tuh tia pơkra pơjing Việt Nam pơphun jơnum ƀơi anăp hăng lăng nao rai mơng ataih hăng 63 anih lăng nao rai ƀơi djop tơring čar, ƀôn prong hăng giăm 20 boh dêh čar amăng rŏng lŏn tơnah. Jơlan hơdră tơlơi dưi mơng pơphun bruă mă pơplih pơčeh phrâo amăng dêh čar hăng rơwang hrơi tơjuh pơplih pơčeh phrâo hăng pơphun bruă mă ƀơi ƀôn prong Hồ Chí Minh hăng hơnong pơkă pơ anăp: pok tơlơi pơmĭn, pơsur pơčeh phrâo, pơlir djop bơnah pơphun bruă mă pơčeh phrâo amăng dêh čar. TECHFEST 2021 hruă kjăp bruă pơlir hơbit djop dêh čar kơplah wah mơnuih ƀon sang Việt Nam, tơlơi thâo thăi hăng hrưn đĭ mơng Việt Nam. Đĭ pơhiăp amăng mông pơbưp anai, Khua dêh čar ơi Phạm Minh Chính brơi thâo, pơplih pơčeh phrâo lĕ tơlơi kiăng pơđĭ kyar ră anai. Khua dêh čar rơkâo djop gưl, djop gơnong bruă lăng glăi bruă pơplih pơčeh phrâo kiăng kơ hơmâo tơlơi găn rơgao amăng pơčeh phrâo ră anai hăng pơ anăp dong.

Siu Đoan: Pơblang