VOV4.Jarai - Tlam lơ 27/8, tơdơi kơ mông ngă bruă hăng tơring čar Bình Dương, Khua dêh čar pel ĕp dong mơn bruă pơgang klin ƀơi Đồng Nai, juh alum ană plơi pla gir pơgang klin. Anih blung a Khua dêh čar ta nao lăng lĕ sang jơnum ngui plơi pla să Thạnh Phú, tơring glông Vĩnh Cửu, tơring čar Đồng Nai anih pơƀut hơdôm bruă gum djru, gơnam ƀong huă...ba nao djru kơ ƀing tơnap tap. Khua dêh čar nao čuă jơmư, juh alum ƀing glăk dŏ djru ngă ƀơi anai, hok mơak kơ pran jua thâo bơdjru nao rai, hla hnil anung ba hla tơ̆i phơ̆i, čang rơmang abih bang gir hloh dong, ƀu pơgao lui pô hlơi kiăng djru ôh đah mơng tañ dưi pơgang klin. Tŏ tui, Khua dêh čar nao čuă jơmư mơnuih ƀon sang dŏ ƀơi anih glăk pơčlah mơnuih mơnam ƀơi tơring glông Vĩnh Cửu hăng plơi prong Biên Hòa. Tơdơi kơ nao sem lăng, Khua dêh čar hơmâo mông ngă bruă hăng khua mua tơring čar Đồng Nai. Ƀơi anai, Khua dêh čar kiăng pơƀut djru kơ kual plơi pla, ƀu brơi mơnuih ƀon sang tơbiă gah rơngiao ôh. Khŏm pơhlôm djru ba gơnam ƀong huă, rơnuk rơnua kơ mơnuih ƀon sang. Ƀu pioh hơmâo pô kơƀah asơi huă añăm ƀong ôh.

Siu H’Mai: Pơblang