VOV4.Jarai -  Lơ 04/11 (yap tui mông ƀơi anih jơnum), ăt amăng rơwang nao čuă dêh čar Prang mơn, Khua dêh čar ta ơi Phạm Minh Chính bơkơtuai laih hăng Khua mir sir dêh čar Prang, ơi Emmanuel Macron.

Amăng mông bơkơtuai, dua gơñu hmâo lăi rơđah khom hơkrŭ đĭ hloh dong phun than gum hrom bơwih ƀong, sĭ mơdrô hăng tuh pơ plai amăng Gum hrom bruă mă tañ kơplah wah Việt Nam hăng Prang, hơdai bơ tŭ ư hrom hơdôm jơlan gah hăng bruă gum hrom pơ̆ anăp kiăng gal brơi hloh dong kơ bruă sĭ mơdrô nao rai gơnam tam kơplah wah dua bôh dêh čar, djru hơdôm bôh anom bơwih ƀong, gơnam tam mơng dua bôh dêh čar ba mut ƀơi anih anom sĭ mơdrô dua bơnah; tŭ ư hrom pơtrut hơdôm rơwang bruă gum hrom amăng hơdôm bruă phun kah hăng jơlan nao rai dŭ pơgiăng, anom mă bruă, đang hmua, rơhuông adai lŏn mơnai, apui yua. Dua bơnah tŭ ư hrom pok pơhai klă hăng mă yua ba glăi bôh tơhnal Tơlơi pơkôl sĭ mơdrô mơ-ak klă Việt Nam hăng EU (EVFTA) hrom hăng anun pơtrut lom pơsit Tơlơi pơkôl pơgang ba gah tuh pơplai Việt Nam hăng EU, pơjing pran pơtrut kơ gum hrom bơwih ƀong, sĭ mơdrô hăng tuh pơplai kơplah wah Việt Nam hăng Prang laih anun EU./.

Siu H’ Prăk: Pô pơblang