VOV4.Jarai - Hlâo kơ anun, amăng tlam lơ 28/10/2021, Khua dêh čar ơi Phạm Minh Chính ba jơlan Grup khua mơng Việt Nam pơhmư̆ mông Jơnum khua mua ASEAN -Nga tal 4 ngă lơphet 30 thun akŏ pơjing tơlơi rô nao rai ASEAN - Nga. Khua git gai hơdôm boh dêh čar ASEAN, Khua mir sir dêh čar Nga ơi Vladimir Putin hăng Khua čih pioh ASEAN nao pơhmư̆ hrŏm mông jơnum anai. Ƀing khua lăi nao tơlơi yôm mơng hrơi ngă lơphet 30 thun ngă hrŏm ASEAN - Nga, hok mơ-ak hơdôm tơlơi pơplih phrâo klă amăng tơlơi rô nao rai ASEAN - Nga laih anun pơsit mă bruă abih bang thun 2021-2025. ASEAN hăng Nga pơsit amra ngă hrŏm kơjăp dưi pơgang klin Covid-19, ngă hrŏm kiăng pơpha hyu vaccine rơnuk rơnua, tŭ yua hăng dưm kơnar kơ abih bang mơnuih amăng kual. Dua bơnah tŭ ư ngă hrŏm, pơtom hiăp nao rai, lăi pơthâo glăi bruă pơgang rơnuk rơnua, tơlơi rơngai, hơđong kơjăp amăng kual, kah hăng Hơduah tơña gưl khua mua pơprong kơ hơdôm tơlơi rơnuk rơnua, hăng pơtom hiăp ASEAN - Nga kơ hơdôm tơlơi rơnuk rơnua boh thâo pôr pơhing. Hơdôm boh dêh čar tŭ ư thun 2022 jing thun Ngă hrŏm gah Boh thâo măi mok kĭ thuâ̆t ASEAN - Nga, ƀuăn amra pơtrut bruă sĭ mơdrô, tuh pơ plai, rŭ glăi hăng hơđong kơjăp bruă pơkra gơnam ba sĭ, pơđĭ tui tơlơi ngă hrŏm kơplah wah Khul pơlir hơbit Bơwih ƀong huă ASIA - Mi Kô̆ (EAEU) hăng ASEAN.

Siu H’Mai: Pơblang