VOV4.Jarai-Pơ ala kơ khua mua amăng kơnuk kơna, Kơ-iăng Khua dêh čar, ơi Lê Minh Khái phrâo kĭ hră pơsit rơnoh prăk pơhrua nao dơ̆ng blơi rơbêh 19 klăk 998 rơbâo gêt ia jrao vaccine pơgang Covid 19 BNT162 mơ̆ng Pfizer. Hră pơtrun anai pơtong rơđah, mă yua rơbêh 2 rơbâo năm rơtuh rơma hơpluh dua klai prăk mơ̆ng Keh prăk blơi vaccine pơgang Covid 19 Việt Nam, kiăng blơi djop 19 klăk 998 rơbâo gêt ia jrao pơgang Covid 19 BNT 162 mơ̆ng Pfizer laih anun pơphun tlâ̆o pơgang Covid 19 tui hăng tơlơi rơkâo mơ̆ng Ding jum ia jrao.

Khua dêh čar jao kơ Ding jum prăk kăk mă yua keh prăk anai djơ̆ hăng tơlơi phiăn. Ding jum ia jrao, ding jum prăk kăk pô glăm ba bruă mă hăng lăi pơthâo glăi. Bruă wai lăng, mă yua, tla prăk tui rơnoh prăk anun khom djơ̆ tơlơi phiăn, djơ̆ bruă kiăng, pơkrem, tŭ yua, pơhaih tong ten, tơpă. Ding jum ia jrao lăi pơthâo hăng khua dêh čar bruă mă yua rơnoh prăk lăi pơthâo anun djơ̆ tơlơi phiăn.

Nay Jek: Pơblang