VOV4.Jarai-Mơguah lơ 18/11, Khua dêh čar ơi Phạm Minh Chính git gai jơnum kơnuk kơna kơ bruă čih pơkra tơlơi phiăn dêh čar amăng blan 11. Jơnum anai pơčrông 6 mơta tơlơi phiăn: Tơlơi phiăn Nua čih pơkra glăi; Tơlơi phiăn Pơhlôm nua ia jrao čih pơkra glăi; Tơlơi phiăn pơhlôm nua bruă mơnuih mơnam čih pơkra glăi; Tơlơi phiăn Pơhlôm, pơgang bruă yua prăk soh čih pơkra glăi; Tơlơi phiăn ngă bruă sĭ mơdrô amăng điện tử; Tơlơi phiăn djă pioh čih pơkra glă. Ƀing ding kơna Kơnuk kơna tŭ ư kơ bruă kiăng, tơhnal pơkă, tơlơi pơmin brơi pơblih pơkra glăi tơlơi phiăn.

Khua dêh čar ơi Phạm Minh Chính git gai jơnum

Hrom hăng anun, ƀing khua mua ăt pơčrâo rơđah hơdôm tơlơi dŏ kơƀah lơ̆m čih pơkra glăi. Tơdơi kơ hmư̆ tơlơi pơgôp hiăp, pơčrông sai, Khua dêh čar ơi Phạm Minh Chính pơtrun hiăp, bruă čih pơkra tơlơi phiăn khom ĕp lăng bruă mă amăng rĭm hrơi, pơsir mơtam tơlơi dŏ kơƀah, dŏ gun, aka ƀu gêh găl tơlơi phiăn hlăk ngă tui ră anai kiăng dưi pơsir djop bruă mă či kiăng amăng tơlơi hơdip mơda.

Nay Jek: Pơblang