VOV4.Jarai -  Lơ 8/10/2021 ƀơi ƀirô Kơnuk kơna, Khua dêh čar ta ơi Phạm Minh Chính hmâo bruă bơkơtuai amăng telephone hăng Khua pơ ala mơng Khua mir sir dêh čar Mi ơi John Kerry kơ tơlơi pơplih ayuh hyiăng. Dua bơnah tŭ ư pơsit tơlơi rô nao rai kơplah wah Mi hăng Việt Nam tơdơi kơ 25 thun pơđĭ kyar hơđong, amăng anun gum hrom bơwih ƀong – sĭ mơdrô, gum hrom pơđĭ kyar kơjăp phik lĕ phun ñu hăng gum hrom apui yua hơdjă, pơkra glăi jing gru rơđah, pran pơtrut phrâo. Ƀrô djơ̆ tal anai, pơ ala kơ Kơnuk kơna hăng mơnuih ƀôn sang Việt Nam, Khua dêh čar ta ơi Phạm Minh Chính pơdah pran jua bơni hăng Kơnuk kơna hăng mơnuih ƀôn sang Mi hmâo djru vaccine hăng gơnam mă yua gah ia jrao kơ Việt Nam pioh pơgang pơgăn klin Covid-19 amăng hơdôm hrơi rơgao. Khua dêh čar ta ơi Phạm Minh Chính pơsit yôm pran pơsit mơng Gong gai Khua mir sir dêh čar Mi ơi Joe Biden pơtrut hơdôm tơlơi gir run hrom đơ đam rŏng lŏn tơnah kiăng bŏng glăi hăng ayuh hyiăng pơplih. Anai lĕ tơlơi đơ đam rŏng lŏn tơnah. Khua dêh čar ta pơsit, khă amăng rơwang pơplih bơwih ƀong hơdjă dŏ bưp lu tơlơi tơnap, Việt Nam pơkôl kơtang dong bŏng glăi hăng pơplih ayuh hyiăng. Khua dêh čar ăt rơkâo mơn bơnah gah Mi kơtưn djru dong kơ Việt Nam pơsir anô̆ pioh glăi mơng blah ngă đưm, biă ñu pơsir jrao dioxin, mơng anun djru ngă klă ayuh hyiăng lŏn mơnai hăng pơđĭ kyar kơjăp ƀơi Việt Nam./.

Siu H’ Prăk: Pô pơblang