VOV4.Jarai -  Čơtlăm lơ 19/10, Khua dêh čar ta, ơi Phạm Minh Chính bưp ƀô̆ mơta khua pơ ala mơbruă hơdôm gưl đah kơmơi ƀrô djơ̆ tal hơdor glăi 91 thun hrơi pơdŏng Khul pơlir hơbit đah kơmơi Việt Nam, Hrơi đah kơmơi Việt Nam 20/10. Amăng mông bưp ƀô̆ mơta, 46 čô mơnuih pơ ala lĕ ƀing neh wa Amĭ Việt Nam sông kơtang, ƀing đah kơmơi mơbruă mơng mơnuih thâo hră, bơwih ƀong, ơi nai ia jrao, ƀing thâo pơčeh tơlơi adôh suang, mơnuih mă bruă mơng sang bruă, khul ling tơhan, pơtom hiăp, đah kơmơi hmâo tơlơi hơdip tơnap, đah kơmơi gum hrom klă bruă pơgang, pơgăn klin hmâo lok glăi hơdôm tơlơi yôm phăn amăng thun rơgao. Pơhiăp amăng mông bưp, Khua dêh čar ta, ơi Phạm Minh Chính pơsit, Ping gah, Kơnuk kơna čih pioh hơdôm pran jua tuh rơyuh hăng bruă mă prong prin mơng đah kơmơi Việt Nam găn rơgao hơdôm rơnuk. Mơnuih ƀôn sang thâo tơngiă pran jua tuh rơyuh prong prin mơng ƀing Amĭ Việt Nam Sông kơtang, ƀing amĭ hmâo tơkeng rai hăng rông ba hơdôm rơnuk ling tơhan sông kơtang mơng lŏn ia sông kơtang./.

Siu H’ Prăk: Pô pơblang