VOV4.Jarai -  Pơhiăp amăng mông jơnum lăng nao rai mơng ataih đơ đam dêh čar ta Grŭp črâo ba mơng lŏn ia hăng Grŭp črâo ba 63 bôh tơring čar, ƀôn prong kiăng pơsit bôh tơhnal yak blung a bruă pơgang, pơgăn klin Covid-19 amăng tal 4 hăng črông lô hơdôm bruă mă, jơlan gah pơgang, pơgăn klin, hơkrŭ glăi bơwih ƀong – mơnuih mơnam pơ̆ anăp anai pơphun amăng mơguah lơ 17/10, Khua dêh čar ta, ơi Phạm Minh Chính, Khua grŭp črâo ba pơgang, pơgăn klin Covid-19 dêh čar ta lăi rơđah, khom pơjing tơlơi hluh gah, ha sa amăng git gai, črâo ba, pơphun bruă ngă tui hơdră bruă, pơtrun pơsit, pơkă amăng pơgang, pơgăn klin kiăng pơlir hơbit amăng dêh čar, gưl yŭ khom ngă tui gưl dlông; gưl yŭ ƀu dưi mă yua tơlơi pơkă soh hăng tơlơi pơkă mơng gưl dlông. Lơ 11/10, Kơnuk kơna hmâo mă yua Tơlơi pơtrun pơsit mrô 128 kơ Pơkă jăng jai “Djơ̆ hăng pơhlôm, pơplih lom kiăng, wai lăng ba glăi bôh tơhnal klin Covid-19”. Ră anai, lu tơring čar, ƀôn prong hmâo pơhru tui dô̆ čơlah mơnuih mơnam, pơplih mơng amăng ƀrư̆ hơdai nao djơ̆ tui pơhlôm, pơplih tañ wai lăng ba glăi bôh tơhnal klin Covid-19. Amăng mông jơnum anai, Grŭp črâo ba mơng dêh čar hăng Grŭp črâo ba hơdôm bôh tơring čar, ƀôn prong amra pel ĕp glăi tơdơi kơ sa rơwang hrơi tơjuh ngă tui Tơlơi pơtrun pơsit mrô 128 mơng Kơnuk kơna. Biă ñu, pel ĕp hơdôm tơlơi dô̆ gun amăng tơlơi pơkă, biă ñu hơdôm tơlơi gun lom ngă tui kiăng hmâo tơlơi pơplih pơkra hmao tlôn, khom pơjing tơlơi pơlir hơbit mơng dêh čar truh plơi pla./.

Siu H’ Prăk: Pô pơblang