VOV4.Jarai - Tom brơi (19/7), tơdơi kơ mông mă brua whăng ƀôn prong Hà Nội, Khua dêh čar ta ơi Phạm Minh Chính git gai jơnum ječ kơplah wah Kơnuk kơna hăng Khul git gai dêh čar amăng pơgang klin Covid-19 kiăng kơ lăi pơthâo kơ bruă pơgang klin, mơng anun amra sem lăng, pơsit hơdôm hơdră bruă khut khăt dong, yua klin glăk ngă tơnap tap ră anai.

Khua dêh čar ta jơnum ječ hăng Khul git gai dêh čar pơgang klin Covid-19

Pok blung mông jơnum, Khua dêh čar ta ơi Phạm Minh Chính rơkâo pơgôp hiăp, pơčrông sai tơpă nao hơdôm bruă bơdjơ̆ nao pơgang klin ră anai, anun lĕ: bruă git gai, bruă ngă tui khut khăt, tơhnal pơkă amăng pơphun bruă, bruă pơpha mơnuih mă bruă, ơi ia jrao, nai ia jrao, mơnuih djru bruă, gơnam tam măi mok, ia jrao, bruă djru gơnam tam gah ia jrao, pơhlôm gơnam ƀong huă, gơnam yua rĭm hrơi brơi mơnuih ƀon sang; bruă wai lăng amăng jơlan glông, pơdŭ pơgiăng hyu gơnam; djru brơi tơlơi hơdip kơ mơnuih ƀon sang, biă mă ñu mơnuih rơngiă bruă mă, mơnuih glăk bưp tơnap tap, tơlơi pơsit mrô 68 kiăng kơ pơhrua dong ƀing mơnuih amra kiăng djru brơi ? hơdôm tơlơi tơnap amăng prăk kak kiăng pơsir hĭ hiưm pă ñu? Mơng anun kiăng tŭ ư ba tơbiă hơdôm hơdră pơsir lăp djơ̆ hăng tơlơi sit nik ră anai.

Siu Đoan: Pơblang