VOV4.Jarai - Mơguah lơ 4/7, Khua dêh čar ta ơi Phạm Minh Chính git gai bruă jơnum lăng nao rai amăng tivi hăng Khua git gai hơdôm Ding jum, gơnong bruă, khua git gai ƀôn prong Hồ Chí Minh, tơring čar Bình Dương, Đồng Nai, Bình Phước, Tây Ninh, Bà Rịa – Vũng Tàu, Long An, Tiền Giang kơ pơgang pơgăn klin Covid-19.

Pơhiăp amăng mông jơnum Khua dêh čar ta ơi Phạm Minh Chính črâo ba: jai glêh tơnap jai hrom gum hrom hơbit, hmư̆ tơlơi gum pơhiăp, lăi pơthâo, tŭ mă, ngă giong, hmâo hơdôm bruă pơsir djơ̆ hăng bôh nik rim plơi pla, anom bruă. Khom djơ̆ na nao, ƀôn prong Hồ Chí Minh, Hà Nội khom đing nao hlâo kơ bruă kơđi čar, bơwih ƀong, mơnuih mơnam, rơnuk rơnua, pơgang lŏn ia hăng jing 2 kual bơwih ƀong phun mơng đơ đam lŏn ia. Khua dêh čar ta pơsit, pơ̆ anăp anai, klin ruă amra ngă glêh tơnap hloh, kiăng gir run dong ngă tui 2 mơta bruă amăng sa wot, samơ̆ đing nao hlâo pơgăn klin hăng pran jua hluh gah “thâo tañ, guang dar kual, dô̆ čơlah tañ, pơgăn klin klă ba glăi bôh tơhnal, tañ hơđong kơđi tơlơi”./.

Siu H’ Prăk: Pô pơblang