VOV4.Jarai - Mơguah lơ 7/6, Khua dêh čar ta ơi Phạm Minh Chính mă bruă hăng khua mua hơdôm bôh ding jum, gơnong bruă, ƀing kơsem min bôh thâo phrâo, mơnuih pơ ala kơ anom kơsem min bôh thâo phrâo, mơnuih pơkra vaccine kơ bruă kơsem min, pơkra vaccine pơgang Covid-19. Khua pơ ala Ding jum ia jrao hmâo lăi pơthâo glăi kơ Khua dêh čar kơ sa dua bôh tơhnal kơsem min mă yua bôh thâo phrâo mơng gơnong bruă ia jrao pioh kơ pơgang pơgăn klin Covid-19 hơdôm hrơi rơgao. Amăng anun, kơsem min pơlar kít pơkă lăng kơman, kít pơgang ngă brơi dêh čar Việt Nam jing sa amăng 5 bôh dêh čar pơđĭ kyar truh kih djuai kít anai.

Jơlan gah pơčrang lăng RT-PCR yak blung a kơ ba glăi bôh tơhnal klă, amra dưi mă yua pơ̆ anăp anai. Truh ră anai, đơ đam dêh čar ta hmâo dua anih anom glăk kơsem min vaccine pơgang Covid-19 lĕ vaccine Nanocovac mơng Sang bruă kơsem min hơdră phrâo sinh học Dược Nanogen hăng vaccine COVIVAC mơng Anom kơsem min vaccine hăng sinh phẩm Nha Trang. Pơhiăp amăng mông mă bruă, Khua dêh čar ta ơi Phạm Minh Chính lăi lĕ, bruă ngă juăt hăng vaccine pơgang Covid-19 ƀu amuñ ôh, biă ñu lĕ amăng mông klin ruă lar tưp hyu lu ƀơi rŏng lŏn tơnah, bôh thâo pơkra vaccine ƀu prong. Khua dêh čar rơkâo hơdôm mơnuih pơ ala bơkơtuai, pơkă lăng hlâo bôh thâo, ngăn rơnoh, tơlơi kiăng, bruă mă amăng pơkra, rak pioh, pơphun tlâ̆o vaccine hiưm hơpă ba glăi bôh tơhnal./.

Siu H’ Prăk: Pô pơblang