VOV4.Jarai - Mơguah lơ 26/10, Khua dêh čar ta ơi Phạm Minh Chính ba jơlan hlâo ƀing khua mua mơng dêh čar Việt Nam nao jơnum lăng nao rai mơng ataih Jơnum khua mua pơprong Khul hơdôm dêh čar kual ASEAN tal 38 (ASEAN 38) tui tơlơi jak iâu mơng Ơi pơtao dêh čar Brunei Hasanal Bolkaih, Khua git gai kual ASEAN thun 2021. Jơnum anai lĕ hrơi mông kiăng Việt Nam tŏ tui pơsit tong hơdră pơtom hiăp hiam klă, gơgrong, djop mơta, djop bơnah, mut hrŏm djop mơta hăng jar kmar laih dong pơhư prong. Đĭ pơhiăp amăng mông jơnum, Khua dêh čar ta ơi Phạm Minh Chính brơi thâo, hrŏm hăng djă pioh boh than dưi ngă, pơtrut bruă pơlir hơbit amăng kual, pơjing sa kual mut hrŏm, kiăng kơ pơsit tong kơdrưh ang mơng kual ASEAN amăng bruă tô nao rai ngă hrŏm amăng bơwih ƀong huă-kơđi čar glăi hmư̆ hing amăng jar kmar, ngă hrŏm hăng pơlir bơwih ƀong djop bơnah, djop gưl amăng kual. Kiăng kơ mut hrŏm dơlăm dong amăng sĭ mơdrô gơnam amăng kual hăng rŏng lŏn tơnah, hrưn đĭ pran pơhưč nao kual ASEAN hăng pơtrut hơkrŭ glăi bơwih ƀong huă tơdơi kơ pơgang hĭ klin.

Tơdơi kơ nao pơhmư̆ Jơnum gưl dlông ASEAN 38, Khua dêh čar ta ơi Phạm Minh Chính hmâo ba jơlan hlâo Grŭp Khua pơ ala gưl dlông dêh čar Việt Nam nao pơhmư̆ Jơnum gưl dlông ASEAN 39. Pơhiăp amăng mông Jơnum, Khua dêh čar ta ơi Phạm Minh Chính pơdah pran jua čang rơmang hmâo sa anih anom kual rơnuk rơnua, hơđong hăng gum hrom kiăng đing nao pơgăn klin, hơkrŭ glăi hăng pơđĭ kyar pơdrong asah amăng khul dong. Khă hnun hai bôh nik ñu brơi ƀuh hơdôm tơlơi pơplih tơnap, bơdjơ̆ nao ƀơi anăp tơlơi hơđong amăng kual. Khua dêh čar ta ơi Phạm Minh Chính ăt rơkâo mơng ASEAN khom hmâo tơlơi pơmin hơđong ƀơi anăp tơlơi ƀơi kual hăng rŏng lŏn tơnah; bơni hơdôm bơnah gum hrom, hăng pran jua gơgrong, pơdŏng, pơpŭ tơlơi phiăn jar kơmar, ƀu ngă bơdjơ̆ nao tơlơi rơnuk rơnua, hơđong gum hrom hăng pơđĭ kyar ƀơi kual, pơpŭ bruă mă mơng ASEAN hăng gum lăi pơthâo djop hăng ASEAN pel ĕp hơdôm hơdră pơkă, bơkơtuai yua kơ ASEAN pơdŏng hăng ba jơlan ASEAN pô gơgrong bruă phun.

Siu Đoan-Siu H’Prăk: Pơblang