VOV4.Jarai - Mơmot lơ 9/8, Khua dêh čar ta ơi Phạm Minh Chính nao pơhmư̆ hăng hmâo tơlơi pơhiăp yôm phăn amăng mông Bơkơtuai pơhư prong Gưl dlông lăng nao rai mơng ataih mơng Khul pơgang rơnuk rơnua Sang gum hơbit djop dêh čar hăng ană ñu “Kơtưn rơnuk rơnua Ia Rơsĭ: Sa bruă gum hrom jar kơmar”. Anai lĕ tal blung a Khul pơgang rơnuk rơnua Sang gum hơbit djop dêh čar pơphun sa bruă jơnum sit nik pha ra kơ anăn ñu rơnuk rơnua ia rơsĭ amăng hơdôm hrơi hmâo lu tơlơi lông kơtang đĭ hăng tơlơi rơnuk rơnua rŏng lŏn tơnah hăng ƀơi hơdôm kual. Amăng tơlơi pơhiăp mơng pô ƀơi Khul pơgang rơnuk rơnua, Khua dêh čar ta ơi Phạm Minh Chính lăi nao hơdôm hơdră pơtrun, hơdră bruă prong mơng Ping gah hăng Kơnuk kơna ta kơ ia rơsĭ, amăng anun hmâo Bruă pơđĭ kyar kơjăp bơwih ƀong ia rơsĭ Việt Nam; rơkâo kơtưn gum hrom jar kơmar kiăng pơsir hơdôm tơlơi lông hrom kơ rơnuk rơnua ia rơsĭ, pơtrut bruă pơpŭ, ngă tui tơlơi phiăn jar kơmar, biă ñu tơlơi pơkôl Sang gum hơbit djop dêh čar kơ Tơlơi phiăn ia rơsĭ thun 1982 hăng pơhlôm tơlơi dưi, bôh tŭ yua lăp djơ̆ mơng hơdôm bôh dêh čar kơtuai hang ia rơsĭ; mơng anun pơdah bruă mă, tơlơi gum hơgôp bruă gơgrong mơng Việt Nam pioh kơ bruă mơng Khul pơgang rơnuk rơnua lăi ha jăn hăng pơsit jơlan gah lom bơkơtuai kơ ia rơsĭ ƀơi hơdôm mông bơkơtuai lu bơnah lăi hrom./.

Siu H’ Prăk: Pô pơblang