VOV4.Jarai - Mơguah lơ 22/6 ƀơi Anom bruă Ding jum kông ang, Khua dêh čar ta ơi Phạm Minh Chính nao pơhmư̆ jơnum klah čun kơ bruă pơjing, pok pơhai anih djă pioh hră pơ-ar mơnuih ƀon sang amăng dêh čar ta; Akŏ bruă pơkra, brơi mă yua hăng wai lăng Căn cước công dân hăng mông lăi pơthâo bruă mă yua sit nik plang djă pioh hră pơ-ar dong mơng lơ 1/7/2021. Đĭ pơhiăp amăng mông ngă lơphet, pơ ala brơi khua mua Ping gah, kơnuk kơna, Khua dêh čar ta ơi Phạm Minh Chính abih pran jua pơpŭ bơni hơdôm tơlơi gir run hăng boh than dưi ngă mơng Ding jum kông ang, tơhan kông ang djop tơring čar; tơlơi gir run gum tơngan hrŏm mơng abih bang mơnuih, djru amăng bruă pơjing plang djă pioh hră pơ-ar mơnuih ƀon sang amăng dêh čar Việt Nam.

Khua dêh čar ta lăi pơtong, anai lĕ bruă mă yôm phăn, pơlir hơbit, ngă lar hyu djop anih, ba glăi tơlơi dưi sit nik, tŭ yua sui thun samơ̆ ăt dŏ lu tơlơi lông pơ anăp dong. Khua dêh čar ta brơi thâo, bruă pơjing plang djă pioh hră pơ-ar phrâo lĕ bruă blung a, mă yua amăng tơlơi hơdip sit nuk, ngă tŭ yua kiăng kơ mơnuih ƀon sang hăng anom bơwih ƀong sĭ mơdrô dưi tŭ mă tơlơi dưi lĕ tơlơi kiăng hloh mơng Ping gah, Kơnuk kơna; djơ̆ hăng tơlơi čang rơmang mơng abih bang mơnuih.

Siu Đoan: Pơblang