VOV4.Jarai - Mơguah lơ 29/12, ƀơi Hà Nội, Khua dêh čar ta ơi Phạm Minh Chính nao pơhmư̆ Jơnum lăng nao rai mơng ataih đơ đam dêh čar klah čun bruă mă thun 2021, pok pơhai kơčăo bruă thun 2022 mơng Gơnong bruă đang hmua hăng pơđĭ kyar ƀôn lan, yua Ding jum đang hmua hăng pơđĭ kyar ƀôn lan dêh čar pơphun. Thun 2021, Gơnong bruă đang hmua hăng pơđĭ kyar ƀôn lan dêh čar pok pơhai ngă tui dong bruă jao amăng tơlơi bŏng glăi hăng lu tơlơi tơnap, tơlơi lông; khă hnun hai ăt hmâo mơn yak đĭ kyar hloh tơhnal pơkă, djơ̆ “tơhnal dua mơta bruă; pơgang, pơgăn rah klin ba glăi bôh tơhnal hăng pơtrut kơtang rah bruă bơwih ƀong huă pơđĭ kyar, djru djop tơlơi kiăng yua amăng lŏn ia hăng sĭ gơnam kơ dêh čar tač rơngiao. Thun 2021, nua đĭ kyar abih bang gơnong bruă (VA) hmâo 2,85 – 2,9%, prăk pơhrui glăi mơng gơnam sĭ kơ dêh čar tač rơngiao gah gơnong bruă hmâo 48 klai 600 klăk dolar Mi. Lu tơhnal pơđĭ kyar mơng gơnong bruă djơ̆ tơhnal pơkă hăng hloh kơ kơčăo bruă ba tơbiă. Thun 2022, gơnong bruă đing nao dăp glăi khop hơdră bơwih ƀong pơđĭ tui nua gơnam hăng pơđĭ kyar kơjăp. Klah čun mông jơnum, Khua dêh čar ta ơi Phạm Minh Chính rơkâo gơnong bruă lăi pơthâo abih bruă mă djơ̆ hăng pơhlôm, pơplih tañ, wai lăng ba glăi bôh tơhnal klin ruă Covid-19, pơgang đuh hlah tơlơi suaih pral, tơlơi hơdip mơng mơnuih ƀôn sang hrom hăng pơtlaih dong tơlơi tơnap kơ bruă bơwih ƀong huă, sĭ mơdrô, djru ba glăi bôh tơhnal mơnuih ƀôn sang hăng anom bơwih ƀong. Mă yua đut tơhnal gal kiăng pơtrut hơkrŭ glăi hăng pơđĭ kyar bơwih ƀong mơnuih mơnam, pơđĭ kyar gơnong bruă đang hmua amăng tơlơi hơđong phrâo./.

Siu H’ Prăk: Pơblang