VOV4.Jarai - Čơtlăm lơ 25/5, Khua dêh čar ta ơi Phạm Minh Chính bơkơtuai amăng telephone hăng Khua dêh čar Australia ơi Scott Morrison. Amăng mông bơkơtuai, Khua dêh čar ta ơi Phạm Minh Chính pơsit amra gum hrom kơjăp hăng Khua dêh čar ơi Scott Morrison kiăng ngă brơi bruă gum hrom kơplah wah Việt Nam hăng Australia jai hrơi ba glăi bôh tŭ yua, dơlăm hăng sit nik.

Dua gơñu hmâo tŭ ư hrom kiăng ba tơbiă tơhnal dlông hloh amăng bruă kơtưn đĭ tuh pơplai, sĭ mơdrô nao rai dua bơnah, anăp nao hơkrŭ glăi kơjăp tơdơi kơ klin kheng, tañ ngă giong hăng kĭ pơkôl bruă kơtưn gum hrom bơwih bong, pơtrut gum hrom kơsem min hơdră phrâo, pok pơhai ba glăi bôh tơhnal “Jơlan hơdră gum hrom pơplih phrâo Việt Nam – Australia rơwang mơng thun 2022-2025”. Gah tơlơi Ia Rơsĭ Ngŏ, dua gơñu pơsit tơhnal yôm phăn mơng bruă djă pioh tơlơi rơnuk rơnua, hơđong, pơhlôm hăng mơ-ak klă bruă rô nao rai jơlan ia rơsĭ hăng rơhuông adai, pơsir mơ-ak klă hơdôm tơlơi bơrơsua hluai tui tơlơi phiăn jar kơmar./.

Siu H’ Prăk: Pô pơblang