VOV4.Jarai - Mơguah lơ 23/11/2021, ƀơi Tokyo, dêh čar Japan, amăng hrơi nao čuă sit nik tal blung a pơ dêh čar Japan, Khua dêh čar ta ơi Phạm Minh Chính hơmâo mông bưp Khua dêh čar Japan hơđăp ơi Suga Yoshihide, Khua čih pioh Ping gah dân chủ tự do hơđăp (LDP), Khua Khul pơlir khua mua pơ ala dêh Japan - Việt Nam Nikai Toshihiro hăng ƀing ding kơna amăng Khul. Khua dêh čar ta ơi Phạm Minh Chính lăi pơtong Japan lĕ dêh čar ngă hrŏm yôm phăn hăng dêh čar Việt Nam; pơdah pran hok mơ-ak lơ̆m tơlơi rô nao rai ngă hrŏm kơplah wah Việt Nam hăng Japan tŏ tui pơđĭ kyar kơtang, djop mơta amăng djop bruă hăng tơlơi đăo gơnang nao rai dua bơnah. Khua dêh čar ta ơi Phạm Minh Chính lăng yôm hơdôm tơlơi gum pơgôp prong prin, yôm phăn mơng Khua dêh čar hơđăp ơi Suga hăng ơi Nikai kah hăng ƀing ding kơna amăng Khul pơlir khua mua pơ ala dêh čar Japan - Việt Nam amăng bruă pơtrut tơlơi rô nao rai jai dơlăm tui kơplah wah dua boh dêh čar hăng ƀu pơdơi pơđĭ kyar kơtang hăng tŭ yua amăng djop bruă, pơtrut ngă hrŏm bơwih ƀong huă, sĭ mơdrô, tuh pơ alin hăng pơbưp nao rai mơnuih ƀon sang dua bơnah; bơni hơ-ơč kơ pran jua kiăng khăp mơng dêh čar Japan pơpŭ brơi kơ mơnuih ƀon sang hăng dêh čar Việt Nam.

Siu Đoan: Pơblang