VOV4.Jarai - Mơguah lơ 28/9, Khua dêh čar ơi Phạm Minh Chính hơmâo mông git gai Jơnum lăng nao rai mơng ataih đơ đam dêh čar kơplah wah Kơnuk kwona hăng djop ding jum, gơnong bruă, anom bruă hăng gong gai ƀon lan kiăng kơ pơtrut bruă jao prăk čan tuh pơ alin bruă dêh čar. Tui hăng hră lăi pơthâo, akŏ bruă tuh pơ alin mă mơng ngăn dră Kơnuk kơna amăng thun 2021 hơmâo Khua dêh čar jao ha wŏt kơ djop ding jum, anom bruă hăng gong gai ƀon lan mơng rơnuč thun 2020 hăng rơnoh prăk lĕ 461.300 klai prăk.

Khua dêh čar ta ơi Phạm Minh Chính git gai Jơnum lăng nao rai mơng ataih kơ bruă pơtrut jao prăk čan tuh pơ alin bruă dêh čar

Truh ră anai, hơmâo  jao brơi hơdôm kơčăo bruă giăm 88% laih. Đĭ pơhiăp amăng mông jơnum, Khua dêh čar ta ơi Phạm Minh Chính brơi thâo: Jơnum anai kiăng kơ lăng glăi boh than dưi ngă, anŏ aka ƀu dưi ngă, sem lăng glăim, biă mă ñu hơdôm tơlơi aka ƀu klă mơng ta pô; mơng anun amra ba tơbiă hơdôm  hơnong pơkă, hơdră bruă pơtrut jao prăk čan tuh pơ alin pơ anăp anai. Khua dêh čar ta rơkâo ƀing khua mua đing nao kơsem min, pơčrông sai kiăng kơ pơtrut jao prăk čan, mă yua brơi lăp djơ̆ amăng tuh pơ alin bruă čar, pơgôp pơđĭ kyar bơwih ƀong huă-mơnuih mơnam thun 2021 hăng ngă akŏ phun kơ bruă pơđĭ kyar bơwih ƀong huă - mơnuih mơnam thun 2022.

Siu Đoan: Pơblang