VOV4.Jarai -  Mơmot lơ 12/9, ƀơi ƀirô mă bruă Kơnuk kơna, Khua dêh čar ta ơi Phạm Minh Chính hmâo git gai mông ngă lơphet pok phun Jơlan hơdră “Glông pôr hăng măi yua kơ čơđai” tui hăng hơdră lăng nao rai mơng ataih hăng 63 bôh tơring čar, ƀôn prong.

Jơlan hơdră kiăng pơdŏng jơlan gah djru hơdôm bôh sang hră, nai pơtô, čơđai sang hră, ƀing hrăm gưl dlông juăt hăng bruă yua măi mrô, huah ĕp amăng internet đuăi hmar pơhlôm, amuñ mă yua kiăng pơhlôm djơ̆ hăng tơlơi kiăng pơtô pơhrăm lăng nao rai mơng ataih; pơsur djru brơi măi mok, hơdôm gơnam mă yua gah hơdră phrâo măi mok, phun than bôh thâo, bruă dăng kông kơ čơđai sang hră, ƀing hrăm gưl dlông kual asuek, ataih, hơdôm bôh sang anô̆ ƀun rin, sang anô̆ ƀun rin ƀơ ƀiă ƀơi hơdôm anih anom glăk ngă tui hơdră tui Tơlơi črâo ba mrô 16 mơng Khua dêh čar hăng pok pơhai hrăm hră lăng nao rai mơng ataih. Khua dêh čar ơi Phạm Minh Chính pơsit, sa amăng hơdôm bruă mă phun mơng Kơnuk kơna ră anai lĕ tañ ngă brơi tơlơi hơdip pơwot glăi kah hăng hlâo adih anun kah mơng tui jơlan gah djơ̆, pơhlôm hăng klin ngă./.

Siu H’ Prăk: Pô pơblang