VOV4.Jarai -  Čơtlăm lơ 26/8, tơdơi kơ pel ĕp bruă pơgang, pơgăn klin ƀơi ƀôn prong, Khua dêh čar ta ơi Phạm Minh Chính Khua Grŭp črâo ba bruă pơgang, pơgăn klin Covid-19 mă bruă hăng ƀôn prong Hồ Chí Minh kơ kơtưn dô̆ čơlah mơnuih mơnam hăng hơdôm bruă pơgang, pơgăn klin Covid-19 ƀơi ƀôn prong. Hlâo kơ anun, mơng akô̆ mông mơguah truh čơtlăm hrơi anai mơn, Khua dêh čar ta hmâo nao laih pơ hơdôm anih anom amăng ƀôn prong kiăng pel ĕp tơlơi ngă tui dô̆ čơlah, djơ̆ hăng tơlơi kiăng hloh kơ tơlơi hơdip mơnuih ƀôn sang tui pran jua ƀu pioh hlơi kơƀah gơnam ƀong huă, ba bruă ia jrao truh giăm mơnuih ƀôn sang tañ hloh ƀơi să, phường, tơring kual, pơhlôm mơnuih ƀôn sang dưi tŭ mă tañ hloh, ƀơi djop anih, djop mông. Pơhiăp amăng mông mă bruă, Khua dêh čar ta ơi Phạm Minh Chính lăi rơđah, tal hyu mă bruă anai kiăng pơsit ƀơ ƀiă bruă pok pơhai kơtưn dô̆ čơlah mơnuih mơnam hăng hơdôm bruă pơgang, pơgăn klin Covid-19 ƀơi ƀôn prong yap mơng lơ 23/8. Khua dêh čar rơkâo ƀing khua pơ ala bơkơtuai, pơsit hơdôm jơlan gah pơsir ba tơbiă, tơdah hơdôm jơlan gah pơsir anai djơ̆, sit, dưi ngă tui thơ pơphun ngă tui kơjăp hloh, ba glăi bôh tơhnal hloh, pơhrua nao ngă giong ƀơ ƀrư̆ hơdôm tơlơi phrâo hmâo amăng ngă tui./.

Siu H’ Prăk: Pô pơblang