VOV4.Jarai - Khua dêh čar ta ơi Phạm Minh Chính phrâo hmâo mông mă bruă hăng Ding jum pơtom hiăp kơ bruă pok pơhai jơlan gah pơtom hiăp tui pran jua Pơtrun pơsit Jơnum prong tal 13 mơng Ping gah. Tơdơi kơ hmư̆ hơdôm tơlơi gum pơhiăp, Khua dêh čar ta ơi Phạm Minh Chính bơni gơnong bruă Pơtom hiăp hmâo ngă tui laih phiăn juăt lăp ư-ang mơng gơnong buă, pok pơhai truh kih jơlan gah pơtom hiăp mơng Ping gah, lăng bôh tŭ yua lŏn ia djuai ania blung hlâo hăng lăng hlâo.

Khua dêh čar ta rơkâo Ding jum pơtom hiăp khom ngă tui kơtang hơdôm bôh tơhnal dưi ngă, pơphun pok pơhai truh kih jơlan gah pơtom hiăp rơngai gơgrong pô, rơnuk rơnua, giăng mah, gum hrom hăng pơđĭ kyar, pơplih phrâo lu bơnah, lu tơlơi tô nao rai pơtom hiăp mơ̆ Tơlơi pơtrun pơsit Jơnum prong tal 13 mơng Ping gah hmâo ba tơbiă, pơhlôm prong hloh kơ lŏn ia djuai ania. Amăng rơnuk phrâo, Khua dêh čar ơi Phạm Minh Chính črâo ba Ding jum pơtom hiăp khom pơtrut kơtang bruă ba jơlan hlâo mơng pơtom hiăp amăng bruă pơdŏng hăng djă kơjăp tơlơi rơnuk rơnua, hơđong; iâu pơhrui hơdôm ngăn rơnoh pioh pơđĭ kyar, djru pơđĭ tui pran gơgrong hăng pran đăo gơnang mơng lŏn ia./.

Siu H’ Prăk: Pô pơblang