VOV4.Jarai - Khua dêh čar ta ơi Phạm Minh Chính phrâo mă bruă hăng Jơnum min mơnuih ƀon sang tơring čar Bình Dương kơ bruă pơgang klin Covid-19 hăng pơđĭ kyar bơwih ƀong huă- mơnuih mơnam. Tơdơi kơ hmư̆ tơring čar Bình Dương lăi pơthâo kơ bruă pơgang klin hăng bruă bơwih ƀong huă mơnuih mơnam laih dong tơlơi pơgôp mơng djop gơnong bruă. Khua dêh čar ta lăng yôm ba than dưi ngă amăng pơgang klin hăng pơđĭ kyar bơwih ƀong huă-mơnuih mơnam ƀơi Bình Dương. Klin ăt dưi pơgang, pơđĭ kyar bơwih ƀong huă ăt đĭ 7%, pơhrui ngăn drăp rơbêh 60%, tơlơi hơdip kơ mơnuih ƀon sang aka ƀu bơbeč nao kơtang mơng klin kman, hơdră djru mơnuih mơnam hơmâo ngă klă.

Khua dêh čar ta ơi Phạm Minh Chính mă bruă hăng tơring čar Bình Dương

Anai lĕ hơdôm tơlơi yôm mơ̆ Bình Dương dưi ngă amăng 6 blan akŏ thun, kiăng kơ tŏ tui ngă klă dong, lăng glăi anŏ klă anŏ aka ƀu klă. Him lăng pơ anăp anai klin amra ngă tơnap tap dong yua kơ ƀing mơnuih F0 aka ƀu thâo ƀă mơng pă ôh. Tơdah pơgang klin ƀu kjăp aka bơbeč nao kơta amăng djop mơta bruă mơng anai truh rơnuč thun, biă mă ñu lĕ pơđĭ kyar bơwih ƀong huă-mơnuih mơnam. Yua anun, kiăng kiăo tui lăng, prap lui tong ten, lăp djơ̆, tŭ yua hloh.

Siu Đoan: Pơblang