VOV4.Jarai- Mơguah lơ 25/11, tŏ tui hơdôm hrơi nao čuă sit nik pơ dêh čar Japan, Khua dêh čar ta ơi Phạm Minh Chính hơmâo nao jơnum pơsur tuh pơ alin kơplah wah Việt Nam - Japan hăng anăn “Việt Nam - Japan hrưn đĭ tơlơi rô nao rai, ngă hrŏm kiăng pơđĭ kyar”. Amăng mông jơnum, Khua dêh čar ta ơi Phạm Minh Chính brơi thâo ñu phrâo hơmâo mông bơkơtuai hiam klă hăng Khua dêh čar Japan ơi Kishida Fumio hăng dua bơnah tŭ ư ba tơbiă tyơlơi pơsit hrŏm kơplah wah Việt Nam - Japan, pơsit tong, tơlơi rô nao rai kơplah wah Việt Nam - Japan glăk amăng thun blan mơ-ak klă hloh dong mơng hlâo anun.

Anai lĕ thun blan gêh gal kiăng pơtrut jơnum pơbưp nao rai, pơđĭ kyar djop mơta kơplah wah dua bơnah, amăng anun hơmâo ngă hrŏm pơđĭ kyar bơwih ƀong huă. Khua dêh čar ơi Phạm Minh Chính brơi thâo, Việt Nam hơmâo lu tơlơi gal kiăng hơdôm anom bruă hơđong nao tuh pơ alin hăng rơnoh prăk lu hloh hăng sui thun, Việt Nam ƀuăn ngă gêh gal amăng hơdră bruă, bruă ngă hră pơ-ar kiăng hơdôm anom bơwih ƀong sĭ mơdrô, amăng anun hơmâo anom bơwih ƀong sĭ mơdrô Japan amuñ rai tuh pơ alin pơ dêh čar Việt Nam.

Siu Đoan: Pơblang