VOV4.Jarai -  Khua dêh čar ta ơi Phạm Minh Chính nao pơhmư̆ mông Jơnum gưl dlông Đông Á tal 16, hrom hăng Khua mua hơdôm bôh dêh čar kual ASEAN hăng hơdôm Bơnah gum hrom anun lĕ Khač, Japan, Hàn Quốc, Australia, New Zealand, India, Nga, Mi hăng Khua čih pioh gah Khul ASEAN.

Pơhiăp amăng mông Jơnum, Khua dêh čar ta ơi Phạm Minh Chính lăi rơđah Đông Á kiăng ngă tui dong bruă mă hăng bôh tŭ yua bruă pơtrut ngă pơdah rơđah, bơkơtuai tơpă ară, pơdŏng pran đăo gơnang, djru klă hơdôm anô̆ pha ra, kơtưn lăi pơthâo bruă gơgrong djru djă pioh rơnuk rơnua, hơđong gum hrom hơdai bơ đĭ kyar ƀơi kual hăng ƀơi rŏng lŏn tơnah. Khua dêh čar rơkâo hơdôm bôh dêh čar khom gum tơngan hrom wai lăng hơdôm tơlơi pơplih djơ̆, ba glăi bôh tơhnal, lăng yôm gum hrom lu bơnah, djơ̆ hrom hơdră bruă, gum hrom bruă mă kiăng bŏng glăi ba glăi bôh tơhnal hăng hơdôm tơlơi lông glăk ƀuh rơđah, pơgăn tơlơi amra ƀu hơđong hăng pơtrut pơđĭ kyar, hơkrŭ glăi kơjăp, biă ñu bruă bơwih ƀong – mơnuih mơnam tơdơi klin ruă./.

Siu H’ Prăk: Pô pơblang