VOV4.Jarai - Tui tơlơi rơkâo mơng dêh čar Chile, Khua dêh čar ta ơi Phạm Minh Chính hơmâo mông pơhiăp telephôn hăng Khua mir sir dêh čar Chile kiăng kơ bơkơtuai tơlơi rô nao rai kơplah wah Việt Nam - Chile kah hăng bruă ngă hrŏm dua bơnah kiăng pơgang hĭ ayuh hyiăng pơplih sat, pơgôp ngă pơgiong hiam klă jơnum khua mua mơng Sang gum hơbit djop dêh čar kơ bruă ayuh hyiăng tal 26 (COP26) pơphun pơ anăp anai.

Amăng mông pơhiăp telephôn, dua čô khua lăng yôm bruă pơđĭ kyar hiam klă tơlơi rô nao rai dua bơnah, sit biă ñu amăng pơđĭ kyar sĭ mơdrô nao rai dua bơnah amăng 9 blan akŏ thun 2021 lĕ 1 klai 470 klăk đôlar Mi, đĭ 59% pơhmu tui tơđar thun hlâo. Dua bơnah tŭ ư sa, dua hơdră bruă kiăng kơtưn rô nao rai ngă hrŏm amăng djop mơta bruă kơplah wah dua bơnah pơ anăp anai. Dua bơnah ăt tŭ ư tŏ tui na nao ngă hrŏm kjăp hăng dong yua tơdruă amăng hơdôm hrơi jơnum amăng jar kmar hăng jơnum djop bơnah, pơgôp ngă hiam tui tơlơi rô nao rai hăng kual ASEAN laih dong kual Thái Bình Dương, pơgôp pơhlôm rơnuk rơnua, hơđong, ngă hrŏm hăng pơđĭ kyar dua kual.

Siu Đoan: Pơblang