VOV4.Jarai -  Čơtlăm lơ 10/9, ƀơi Ƀirô mă bruă Kơnuk kơna, Khua dêh čar ta ơi Phạm Minh Chính hmâo tŭ jum Khua anih jưh pơ ala kơ Hà Lan Elsbeth Akkerman. Amăng mông tŭ jum, Khua anih jưh pơ ala kơ Hà Lan pơsit Kơnuk kơna Hà Lan lăng yôm bruă gum hrom abih bang, Gum hrom bruă ngă juăt hăng pơplih ayuh hyiăng hăng wai lăng ia hăng đang hmua kơjăp phik hăng Việt Nam, lăng anun lĕ phun than kơjăp, djru ngă brơi tơlơi rô nao rai kơplah wah dua Kơnuk kơna hăng anom bơwih ƀong dua bôh dêh čar pơđĭ kyar dơlăm prong hăng ba glăi bôh tơhnal.

Khua dêh čar ta ơi Phạm Minh Chính rơkâo Khua anih jưh pơ ala kơ Hà Lan rơkâo hăng Kơnuk kơna, hơdôm ƀirô bơdjơ̆ nao hăng anom bơwih ƀong mơng Hà Lan djru dong Việt Nam tañ hmâo mrô vaccine găn rơgao lu hơdră kah hăng brơi čan ƀudah sĭ glăi, ăt kah hăng djru jrao pơjrao mơnuih ƀă kơman klin hăng gơnam mă yua gah ia jrao kơ Việt Nam mơn. Gah tơlơi ia rơsĭ Ngŏ, Khua anih jưh pơ ala kơ Hà Lan brơi thâo Hà Lan dŏng yua tơlơi pơmin mơng ASEAN, pơsit čang rơmang djă pioh tơlơi rơnuk rơnua, hơđong, pơhlôm hăng mơ-ak klă gah ia rơsĭ hăng rơhuông adai, pơsir hơdôm tơlơi bơrơsua hăng hơdôm jơlan gah rơnuk rơnua, hluai tui tơlơi phiăn jar kơmar, amăng anun hmâo Tơlơi pơkôl Sang gum hơbit djop dêh čar kơ Phiăn ia rơsĭ thun 1982./.

Siu H’ Prăk: Pô pơblang