VOV4.Jarai - Ƀơi ƀirô mă bruă Kơnuk kơna, Khua dêh čar ta ơi Phạm Minh Chính hmâo laih mông tŭ jum yă Victoria Kwakwa, Kơ-iăng Khua Sang prăk rŏng lŏn tơnah gơgrong ƀơi kual Đông Á hăng Thái Bình Dương glăk hmâo tal rai čuă hăng mă bruă ƀơi Việt Nam. Amăng tơlơi mơ-ak klă, tơpă sit, pơđao pran jua, Khua dêh čar ta bơni yă Victoria Kwakwa pơwot glăi Việt Nam, lăi rơđah WB jing bơnah gum hrom pơđĭ kyar yôm phăn djru gum hăng gum hơgôp klă amăng tơlơi pơđĭ kyar bơwih ƀong – mơnuih mơnam mơng Việt Nam; Hrom hăng anun pơsit yôm WB hmâo lu tơlơi lăi pơthâo hơdră bruă prong ba glăi bôh tơhnal, djơ̆ hăng hơdôm jơlan gah, tơhnal pơkă pơđĭ kyar mơng Việt Nam amăng hơdôm tal. Khua dêh čar ta bơni kơ WB hmâo djru laih Việt Nam dưi pơhrơ̆i tla hnưh tañ hơdôm prăk čan IDA kiăng hmâo dong ngăn drăp pơgang pơgăn klin hăng djă pioh rơnoh đĭ kyar bơwih ƀong; pơsit yôm tơlơi pơčeh mơng WB hmâo djru laih hơdôm bôh dêh čar pơgang pơgăn klin Covid-19, amăng anun hmâo Việt Nam./.

Siu H’ Prăk: Pô pơblang