VOV4.Jarai - Pơhiăp ƀơi mông Jơnum khua mua prong ASEAN kơ ngă hrŏm kual anet yua pơđĭ kyar abih bang hăng pơđĭ kyar hơđong kơjăp pơphun mơguah lơ 30/11 lăng nao rai mơng ataih amăng tivi. Khua dêh čar ơi Phạm Minh Chính kiăng ngă hrŏm amăng kual anet hrơi blan pơ anăp kiăng pơƀut ƀơi 3 mơta tơlơi phun yua tơlơi đĭ kyar hơđong kơjăp. Pơhiăp ƀơi mông jơnum, Khua dêh čar ơi Phạm Minh Chính lăi, gum hrŏm ngă bruă kơjăp kơplah wah hơdôm boh dêh čar jing tơlơi kiăng yôm đah mơng pơhlôm pơđĭ kyar abih bang hăng hơđong kơjăp. Laih dong mă yua klă hơdôm tơlơi gêh gal, tơlơi hơmâo ƀơi kual, kiăng bơwih ƀong sĭ mơdrô, tuh pơ plai prăk kăk kơ anom bơwih ƀong hăng ngă hrŏm kơnuk kơna hăng mơnuih ƀon sang amuñ hloh.

Khua dêh čar ơi Phạm Minh Chính đăo gơnang, kiăo tui mông jơnum blung a kơ ngă hrŏm amăng kual anet tal anai, amra djă bong hăng pơtrut đĭ tơlơi ngă hrŏm hăng pơđĭ kyar kual anet amăng kual ASEAN pơ anăp, gum pơgôp amăng bruă dưi akŏ pơdong sa kual ASEAN pơđĭ kyar dưm kơnar, gum pơgôp măng tơlơi rơngai, hơđong kơjăp bruă ngă hrŏm amăng kual hăng ƀơi rŏng lŏn tơnah.

Siu H’Mai: Pơblang