VOV4.Jarai - Mơguah lơ 15/8, Khua dêh čar ta ơi Phạm Minh Chính git gai mông jơnum lăng nao rai mơng ataih klah čun bruă pơgang, pơgăn klin Covid-19 hăng hơdôm bôh tơring čar, ƀôn prong glăk ngă tui dô̆ čơlah mơnuih mơnam tui Tơlơi črâo ba mrô 16 mơng Khua dêh čar hăng pok pơhai ngă tui Tơlơi pơtrun pơsit mrô 86 mơng Kơnuk kơna kơ hơdôm bruă ječ pơgang, pơgăn klin Covid-19.

Pơhiăp klah čun jơnum, Khua dêh čar ta ơi Phạm Minh Chính lăi rơđah, hơdôm hrơi rơgao, bruă ngă tui Tơlơi črâo ba mrô 16 mơng Khua dêh čar hơdôm bôh tơring čar, ƀôn prong hmâo laih bôh tơhnal klă, djơ̆ tơhnal ba tơbiă. Khua dêh čar lăi rơđah, tơlơi glăk ngă tơnap, hmâo anih kơtang biă. Pran jua ăt lĕ “Pơgăn klin kah hăng pơgăn ayăt”, iâu pơhrui abih bang glông bruă kơđi čar, abih bang mơnuih ƀôn sang gum hrom pơgăn klin. Khuă dêh čar lăi rơđah, khom tlâ̆o pơgang brơi đôč vaccine kơ abih bang mơnuih ƀôn sang. Ding jum ia jrao lĕ ƀirô wai lăng Kơnuk kơna gơgrong ba pơsit anô̆ klă, pơsit hră pơ-ar, rak pioh; ƀu pơphun tlâ̆o apah prăk ôh, hlơi tlâ̆o jrao pơgang apah prăk khom pơsir mơtăm. Hơdôm bôh tơring čar, ƀôn prong glăk ngă tui Tơlơi črâo ba mrô 16 khom đing nao kơ pơgang pơgăn klin, ƀơi hơpă pơhlôm lĕ khom pơđĭ kyar bơwih ƀong./.

Siu H’ Prăk: Pô pơblang