VOV4.Jarai - Ƀơi plơi prong jưh jom Paris (Prang), anom bruă rơdêh por Bamboo Airsway hăng grup bơwih ƀong Safran hơmâo kĭ hră čih pioh tơlơi ngă hrŏm ƀơi anăp Khua dêh čar Việt Nam ơi Phạm Minh Chính hăng Khua dêh čar Prang ơi Jean Castex. Tơlơi anai hơmâo amăng bruă nao čuă sit nik dêh čar Prang mơng lơ 3 truh lơ 5/11 mơng Khua dêh čar Phạm Minh Chính. Ƀơi mông kĭ hră, Anom bruă rơdêh por Bamboo Airsway hăng Safran - Grup bơwih ƀong prong ƀơi rŏng lŏn tơnah gah boh thâo măi mok kĭ thuâ̆t rơdêh por - hơmâo kĭ hră čih pioh tơlơi ngă hrŏm ruah măi mok rơdêh por kơ 50 boh rơdêh por A321NEO hăng 30 boh rơdêh por Boeing 787-9 mơng Bamboo Airsway. Prăk kĭ pơkôl ngă hrŏm hơmâo 2 klai euro.

Khua dêh čar Việt Nam hăng Prang lăo lăng bruă kĭ hră 2 klai euro kơplah wah Bamboo Airsway hăng Safran.

Sit nik ngă hrŏm hăng Việt Nam mơng thun 2013, truh mông anai dêh čar Prang hăng Việt Nam rô nao rai klă, gum pơđĭ kyar amăng lu bruă mă. Amăng bruă rơdêh por pơgiăng tuai, Việt Nam - Prang hơmâo tơlơi ngă hrŏm mơng hlâo, amăng abih bang bruă. Anom bruă rơdêh por Việt Nam hăng Anom bruă rơdêh por dêh čar Prang hơmâo kĭ pơkôl hră ngă hrŏm măi mok kĭ thuâ̆t. 

Siu H’Mai: Pơblang