VOV4.Jarai - Čơkă mông ngă lơphet hơdor glăi 74 thun Hrơi pioh kơ tơhan rơka, tơhan djai pơsăn drơi (27/7), tlam kơ 19/7, Khua ding jum mơnuih mă bruă tơhan rơka hăng mơnuih mơnam ơi Đào Ngọc Dung hrŏm hăng khua mua mơng Ding jum hơmâo nao čuă, brơi gơnam kơ hơdôm boh sang anŏ djru lŏn ia ta đưm ƀơi Hà Nội. Khua ding jum ơi Đào Ngọc Dung hrŏm hăng ƀing khua hơmâo nao čuă, brơi gơnam kơ 3 boh sang anŏ ƀơi ƀon prong Hà Nội anun lĕ: sang anŏ ơi Phạm Đình Thi, tơhan rơka  kơtang 81%; sang anŏ yă Đỗ Thị Hành lĕ bơnai tơhan djai pơsăn drơi Nguyễn Văn Thuyết lêng dŏ ƀơi kuâ̆n Long Biên hăng sang anŏ ơi Nguyễn Tường Vinh, tơhan rơka kơtang 81% dŏ ƀơi kuâ̆n Ba Đình. Nao čuă hơdôm boh sang anŏ hơkrŭ lŏn ia đưm, Khua Ding jum Mơnuih mă bruă Tơhan rơka hăng Mơnuih mơnam Đào Ngọc Dung pơdah pran jua bơni biă mă hăng tơlơi gum djru prong prin hăng tơlơi djai rơngiă mơng hơdôm boh sang anŏ, laih dong kiăng hơdôm sang anŏ anai pơtrut đĭ dong pran jua gum pơgôp hơkrŭ lŏn ia, gir găn rơgao tơlơi tơnap, ngă gru brơi ană tơčô hla tui, mă bruă, pơkra gơnam, mơng anun gum djru pơđĭ kyar plơi pla, lŏn ia.

Siu H’Mai: Pơblang