VOV4.Jarai - Ƀơi ƀôn prong Hà Nội, Thượng tướng Phan Văn Giang, Khua Ding jum khul ling tơhan dêh čar ta hmâo mă bruă hăng hơdôm bôh ƀirô, anom bruă kơ bruă pơhlôm hơđong kơ bruă ruah khua pơ ala mơnuih ƀôn sang dêh čar ta tal 15 hăng khua pơ ala Khul pơ ala mơnuih ƀôn sang hơdôm gưl rơwang bruă mơng thun 2021-2026. Ƀơi mông mă bruă, Thượng tướng Phan Văn Giang rơkâo hơdôm bôh ƀirô, anom bruă kơtưn hơdôm bruă kiăng thâo kơjăp tơlơi, lăi pơthâo nao rai na nao tơlơi pơhing kơplah wah hơdôm khul ling tơhan, pơsit, pơkă lăng hlâo tơlơi pơmin ƀu klă, hyu hơduah ĕp tơlơi ngă sat kơdŏng glăi mơng ƀing kơdŏng glăi kơnuk kơna. Hơdôm bôh anom apăn bruă wai lăng, wai lăng kơjăp kual rơhuông adai, kual ia rơsĭ, guai lŏn ia, anih anom amăng lŏn ia hăng glông internet; prăp lui khul ling tơhan, gơnam mă yua, prăp lui gum hrom pơsir ba glăi bôh tơhnal hơdôm tơlơi truh. Khul ling tơhan djă pioh tơpă bruă dô̆ gak; gum hrom hăng hơdôm bôh ƀirô, anom bruă amăng hăng rơngiao kơ khul ling tơhan kiăng thâo kơjăp tơlơi, pơgang pơhlôm khop bruă ruah khua. Hrom hăng bruă ngă tui tơpă hơdôm bruă pơgang pơgăn klin Covid, Thượng tướng Phan Văn Giang rơkâo hơdôm bôh ƀirô, anom bruă kiăng klă dong bruă lăi pơhing, djru mơnuih apăn bruă tơhan, ling tơhan amăng anom bruă ngă tui klă tơlơi dưi, bruă mă mơng pô gum hrom ruah khua./.

Siu H’ Prăk: Pô pơblang