VOV4.Jarai - Ƀơi Hà Nội, Đại tướng Tô Lâm, Ding kơna Ding jum kơđi čar, Khua ding jum Kông an tŭ jum Khua ding jum pơtom hiăp ngă rah Khua ding jum Khul đah kơmơi Australia yă Marise Payne glăk rai čuă hăng ngă bruă ƀơi Việt Nam. Ƀơi mông čơkă, Khua ding jum ơi Tô Lâm lăi rơđah, hăng tơlơi djru ba mơng Ding jum pơtom hiăp Australia, tơlơi rô nao rai ngă hrŏm kơplah wah Ding jum kông an Việt Nam hăng hơdôm anom bruă mă yua tơlơi phiăn Australia amăng ƀrư̆ hơmâo pơđĭ tui hloh amăng bruă pơgang, pơgăn ƀing ngă soh, wai lăng bruă mut tơbiă nao rai amăng dêh čar, djru nao rai gah tơlơi phiăn...Dua bơnah ăt pơphun re se mơn bruă jơnum tơña kơ bruă wai lăng mut nao rai pơ čar rơngiao, djru nao rai pơsit tơlơi pơhing, pơsir bruă arăng ba mơnuih đuăi nao pơ dêh čar pơkŏn ča čot, pôr pơhing bruă pơgăn đuăi nao rai pơ čar rơngiao ča čot... Kiăng pơtrut hloh dong tơlơi rô nao rai kơplah wah dua boh dêh čar lăi hrŏm, kơplah wah Ding jum Kông an Việt Nam hăng ƀing gŏp Australia lăi hơjăn, Khua ding jum ding ling tơhan ơi Tô Lâm kiăng dua bơnah ngă hrŏm kơjăp hloh gah sĭ mơdrô, tuh pơ plai kiăng djru nao rai hơkrŭ glăi tơlơi bơwih ƀong tơdơi anih klin Covid-19; pơđĭ tui tơlơi ngă hrŏm, ngă klă jơlan hơdră pok pơhai tơlơi rô nao rai ngă gŏp yôm Việt Nam - Australia rơwang thun 2020-2030.

Siu H’Mai: Pơblang